D’AINMNIGH MOLTÓIRÍ Fhéile na Meán Ceilteach RTÉ Raidió na Gaeltachta mar stáisiún raidió na bliana ar ócáid sa Bhreatain Bhig Dé hAoine.
Dúirt ceannaire RnaG, Edel Ní Chuireáin, gur onóir a bhí sa ghradam a thug aitheantas d’obair na foirne gach aon áit.
Ba é an tuairim a bhí agam féin den tseirbhís le fada gur seirbhís réigiúnach a bhí ann a chraol ar bhonn náisiúnta, is é sin, ag brath ar am an lae, d’fhéadfá éisteacht leat ar do shuaimhneas nó é a mhúchadh mar nár bhain an clár leat beag ná mór. Ba é an bhéim ar an ní áitiúil láidreacht agus laige na seirbhíse; mheall sé nó chuir sé ó dhoras thú.
Tá mé ag déanamh go bhfuil maolú ag teacht ar an chlaonadh sin. Is léir go bhfuil cláir ar leith dírithe ar cheantair ar leith – ní bheifeá ag súil lena mhalairt – ach ní hionann canúint amháin anois agus dearcadh cúngaigeanta ceantair i gcás gach uile chlár.
Bhí i gcónaí cur chuige náisiúnta (agus fiúntas nach beag) leis an tseirbhís laethúil nuachta agus leis an tseirbhís óige san oíche. Leoga, is doiligh a chreidbheáil go raibh an oiread sin conspóide faoi cheol Béarla a chraoladh ar an stáisiún ach ba é an cinneadh ceart é.
Is mór an chodarsnacht idir na láitheoirí óga agus cuid de na seanfhondúirí; tá a gcuid buanna féin acu uilig agus is fearr an rogha a thugann siad don éisteoir.
Bíodh is go ndeirtear nach féidir freastal ar dhá thrá, éiríonn le RnaG freastal ar cheithre nó chúig cinn de thránna agus is freastal maith é níos minice ná a mhalairt.