Tiomna nimhe

Léirigh Paisley gur saint chun cumhachta a spreag é

An tUrramach Ian Paisley. grianghraf: dara mac dónaill

An tUrramach Ian Paisley. grianghraf: dara mac dónaill

Wed, Jan 22, 2014, 01:25

Ba é tiomna deiridh Ian Paisley é, de réir scéil, a fhocal scoir ar na meáin chumarsáide. Dhá chlár teilifíse a mhair dhá uair an chloig ar fad. Deis bhreá ag an seantuathghríosóir chun a leagan féin dá stair a chraobhscaoileadh.

Níorbh é a leas é. Níor mhaise ar a chlú é. Má ba é snas ar a oidhreacht an cuspóir, theip air.

Bhí na cláracha thar a bheith suimiúil agus b’fhiú go mór iad a dhéanamh ó thaobh na teilifíse agus na hiriseoireachta de.

Níor bhuntáiste don DUP é ráithe roimh thoghcháin gan dabht ach níor shochar d’Ian Paisley féin é. D’éirigh leis teannas agus spairn a chothú mar ba dual dó don chuid is mó dá shaol poiblí.

Neartaigh sé an bharúil gur chumhacht dó féin a bhí mar threoirphrionsabail aige ón tús agus léirigh sé nach nglacfadh sé freagarthacht ach nuair a d’fheil sé dó.

Tá a fhios ag an saol anois na líomhaintí a rinne muintir Paisley sna cláracha a rinne an t-iriseoir Eamonn Mallie agus a craoladh ar BBC Thuaisceart Éireann. Bhí an dara clár beo le gangaid agus nimh.

Lig Ian Paisley amach a dheascaí ar a chomharbaí sa pháirtí polaitíochta agus san eaglais a bhunaigh sé.

Rinneadh go leor cainte faoi dhílseacht don Soiscéal ach is cosúil gur shoiscéal nimhiúil é.

Bhí seantaithí ag an bpobal ar bhinib agus maslaí Paisley i gcaitheamh na mblianta. Sa chéad chlár shéan sé gur ghríos sé daoine chun aindlí agus mhaígh sé gur “ar mhaithe leis an gcúis” a bhí sé ansin. Ní hamhlaidh anois. Faltanas pearsanta a nochtadh sa dara clár.

Bhí measúnú Phaisley ar an DUP agus ar an Eaglais Shaor-Phreispitéireach míthrócaireach.

Tiarna agus Bantiarna is ea an tUrramach Paisley agus a bhean, Eileen anois; onóracha agus aitheantas tugtha dóibh i ndeireadh a ré.

Ba léir áfach gur ghoill sé go smior orthu beirt gur chaill sé a stádas polaitiúil agus eaglasta i 2008. Ba léir freisin nach maithfeadh ceachtar acu go deo don dream a “ruaig” é mar Chéad Aire/ceannaire DUP agus mar Mhodhnóir na Saor-Phreispitéireach.

Bhí cloch sa mhuinchille do Peter Robinson go háirithe “an fear nach raibh in ann a shuíochán a choinneáil”. Rinneadh tagairtí drochmheasúla d’fhadhbanna pearsanta mhuintir Robinson i gcodarsnacht le glaine theaghlach Paisley.

Bhí scata eile nár spáráladh, leithéidí Nigel Dodds “the Mighty Dodds” go tarcaisneach, cathaoirleach an pháirtí an Tiarna Morrow agus iarchomhairleoir Ian Paisley i Stormont, Timothy Johnston.

Díol suntais ab ea é gur eisigh siadsan agus an DUP ráiteas 24 uair sular craoladh an clár chun a leagan féin a chur ar an taifead agus chun cuimhne Ian Paisley a cheistiú.

Éagóir i súile Ian agus Eileen?

Gur thug siad a réimeas chun deiridh in aois a dhá bhliain agus ceithre scór. Feallmharú, dar lena bhean. Scian sa droim.

Thug sé le fios ag an am gur dá dheoin féin a bhí sé ag éirí as an Chéad Aireacht agus ceannaireacht an DUP ach bhí an scéal amuigh gurbh iad na fir sna cultacha liatha faoi ndear é.

Díoltas
Rinne sé a dhícheall sa chlár chun a dhíoltas a bhaint amach, chun iad a lagú más féidir é.

An féidir? Sin í an cheist. D’éirigh leis na hionsaithe a rinne Ian Paisley ó na 1960idí ar aghaidh ar cheannairí aontachtacha ó Terence O’Neill go David Trimble.

Scrios sé gach ceannaire aontachtach roimhe féin a ghlac céim ar bith i dtreo aitheantais do náisiúnaithe nó roinnt cumhachta.

Ansin i 2007 nuair a bhí an stádas mar cheannaire an phríomhpháirtí aontachtaigh bainte amach aige ghlac sé féin an chéim mhór agus chuaigh i mbun roinnt cumhachta le Sinn Féin.

Is fíor gur dócha gurbh eisean an t-aon duine a raibh dóthain tacaíochta aige chun an chéim sin a ghlacadh.

Is fíor freisin gur mheas daoine a bhí ag faire go géar ar chúrsaí i Stormont go raibh a chumas ag dul i léig. Measadh gur thábhachtaí mar shiombail an chomhréitigh é ná mar riarthóir. Mar sin, ní hí an obair a airíonn sé uaidh dar le léirmheastóirí – ach an stádas.

Ní léir go n-éireoidh leis an saighdeán seo Peter Robinson a chriogadh ach déanfaidh sé dochar.

Ceapadh ar feadh na mblianta go gcaillfeadh Robinson tacaíocht na Saor-Phreispitéireach nuair a d’imigh Paisley ach, ar ndóigh, bhris an Eaglais sin croíthe mhuintir Paisley nuair a ruaig siadsan é “go neamhdhiagach” dar le hEileen. Caolsheans mar sin go dtabharfadh na Free Ps aird ar an iarmhodhnóir anois.

Dá mbeadh an fogha tugtha faoina chomharba cúpla bliain ó shin seans go mbeadh dochar ollmhór déanta aige agus nach dtiocfadh Robinson slán.

Ach tá Paisley imithe as an bpolaitíocht le sé bliana agus bhí a ionsaí ar Robinson chomh hainmheasartha sin – ag úsáid téarma ar nós “beast” an Bhíobla – go mb’fhéidir gur saothar in aisce é.

Ní hé sin le rá nár chothaigh sé guagacht san DUP; tá tréimhse chorrach i ndán don bpáirtí.

Sign In

Forgot Password?

Sign Up

The name that will appear beside your comments.

Have an account? Sign In

Forgot Password?

Please enter your email address so we can send you a link to reset your password.

Sign In or Sign Up

Thank you

You should receive instructions for resetting your password. When you have reset your password, you can Sign In.

Hello, .

Please choose a screen name. This name will appear beside any comments you post. Your screen name should follow the standards set out in our community standards.

Thank you for registering. Please check your email to verify your account.

We reserve the right to remove any content at any time from this Community, including without limitation if it violates the Community Standards. We ask that you report content that you in good faith believe violates the above rules by clicking the Flag link next to the offending comment or by filling out this form. New comments are only accepted for 3 days from the date of publication.