IS FADA aithne ag léitheoirí an nuachtáin seo ar shaothar Gabriel Rosenstock mar údar aistí, aistritheoir agus file.
Ach is mar dhrámadóir raidió a bheidh Rosenstock le cluinstin ar ball. Tá sraith ceithre dhráma dá chuid – Sruth Ama – le craoladh ar Raidió na Life (106.4FM) seachtain ón Aoine ag 6.30pm. (Beidh deis ag éisteoirí nach féidir leo an stáisiún a aimsiú na drámaí a íoslódáil fosta.)
Baineann na drámaí leis an nuachtán ficseanúil, Amanathar. Scríobh Rosenstock dráma raidió ar an nuachtán céanna thiar sa bhliain 1989 ach d’iarr a mhac, Tristan, air cur leis an téama agus as sin a thagann na drámaí nua.
Dúirt Rosenstock gur tharraing sé as a thaithí féin leis an “dá bhliain eachtrúla” a chaith sé ag obair ar an nuachtán seachtainiúil, Anois, mar bhuninspioráid don saothar an chéad lá riamh.
Sheas an taithí sin dó agus é ag cur leis an tsraith. Déanann sé cur síos ar na dúshláin a bhaineann le nuachtán Gaeilge a chur ar fáil agus tá “grá agus gruaim” san insint, a dúirt sé.
Is é dóchas Gabriel go mbeadh “rud éigin i ndán don dráma raidió i nGaeilge. Bhí an t-ádh liom go rabhas páirteach go minic, mar scríbhneoir agus mar aisteoir, i ré órga an dráma raidió in RTÉ – cá bhfuil an sneachta a bhí chomh geal anuraidh?
“Cruthaíonn fiontar seo Raidió na Life nach fíor go bhfuil an dráma raidió i ndeireadh na feide. Cá bhfios ná go bhfuil ré nua i ndán dó?”
Ní amháin gur scríobh Gabriel Rosenstock na drámaí ach glacann sé páirt iontu agus is é Tristan Rosenstock léiritheoir na sraithe.
Marcus Lamb, Doireann Ní Chorragáin, Aodh Ó Domhnaill agus Damhnait Ní Thuama cuid de na haisteoirí eile a bheidh le cluinstin ann.