Cnuasach nua filíochta le Declan Collinge

Seolfaidh Coiscéim cnuasach nua filíochta le Declan Collinge, Athchuairt ar an Éigse, Dé Céadaoin, 30ú Lúnasa ag 7pm, sa Siopa Leabhar, 6 Sráid Fhearchair, Baile Átha Cliath.

Bíonn Collinge ag scríobh go minic sa chúinne bheag seo den Irish Times ach is fada i mbun pinn é mar fhile fosta agus filíocht foilsithe i nGaeilge agus i mBéarla aige. Tháinig sé ar an tsaol in Inse Chór i mBaile Átha Cliath sa bhliain 1949 agus d’fhreastail sé ar Choláiste na hOllscoile, Baile Átha Cliath. Tá BA, MA agus PhD aige agus d’imir Máirtín Ó Direáin tionchar mór ar a chuid filíochta.

Scríobhann Collinge i réamhrá Athchuairt ar an Éigse: “Seanfhocal nach gcloistear rómhinic ar na laethanta seo ná ‘cuairt an lao ar an athbhuaile,’ a chiallaíonn athchuairt chumhach. Ina aiste cháiliúil ‘Tradition and the Individual Talent,’ mhaígh TS Eliot nach raibh a chiall féin ag aon fhile amháin; gur bhain oiread dá chiall leis na filí a chuaigh roimhe; thairis sin go raibh de dhualgas ar an bhfile nua-aimseartha cuimhneamh ar an dtraidisiún filíochta a chuaigh roimhe agus é a chur san áireamh.”

Is é cuspóir Collinge comhairle Eliot a leanstan. Tá ábhar sa leabhar nua ó Chatullus na Laidine go Séamas Dall Mac Cuarta, ó Bhaudelaire go Paz agus Yevtushenko.

Dún Chaoin – an scoil nár dúnadh

---

An teanga dhomhanda a chuaigh i léig

---

Dhá leabhar nua le scríbhneoirí ón Rinn seolta

---

I gcásanna áirithe spreagann an saothar bunúil macalla ina chuid dánta féin; i gcásanna eile is athchruthú é a dhán ar an dán bunúsach.