Úrscéal mór de chuid Chinua Achebe le fáil i nGaeilge

Bhí Chinua Achebe (1930-2013) ar dhuine de na scríbhneoirí ba chlúite a mhair agus bhain sé cáil dhomhanda amach de bharr a úrscéil, Things Fall Apart.

Scéal an laoich, Okonkwo, is ábhar don leabhar “duine ceanndána lasánta ... agus is minic a theipeann air srian a chur leis an fhearg. Íocann sé féin agus a mhuintir go daor as sin. Nuair a bhagraíonn teacht an fhir ghil ar thraidisiún an treabhachais, gníomhaíonn Okonkwo as a stuaim féin. Toradh tragóideach atá i ndán dó, áfach”.

Tá an leabhar aistrithe go breis agus 50 teanga agus tá os cionn 10 milliún cóip de díolta ó foilsíodh den chéad uair é sa bhliain 1958.

Irene Duffy Lynch atá i ndiaidh an leabhar a thiontú go Gaeilge mar Titeann Rudaí as a Chéile (Coiscéim, €12). Is de bhunadh Mhaigh Eo í Duffy Lynch agus chaith sí seal ina cónaí sa Nigéir, tír dhúchais Achebe.

Bronnadh céime agus bóthar na beatha

---

Úrscéal nua bleachtaireachta scríofa ag Alan Titley

---

As dáta

---

Casadh Chinua Achebe ar Duffy Lynch agus tá agallamh dá cuid leis an údar mar chuid de réamhrá an leabhair. “Is rud an-chumhachtach é an scéal,” a dúirt sé léi, “Is é an scéalaí agus a chuid scéalta a chruthaíonn stair agus cuimhne na ndaoine. Ní fhéadfaí ciall a bhaint as an bheatha ar aon chaoi eile. Nuair a bhí mé óg, bhí tábhacht an-mhór ag baint le scéalta, agus chuir siad lúcháir mhór orm.

“D’iompair siad mé chuig ríocht eile, chuig cineál beatha a thug compord mór dom. Má deirim ‘aoibhneas’, ní leor é. Bhí sásamh spioradálta ag gabháil leis.”