SEISEAR SCRÍBHNEOIRÍ atá ainmnithe ar an ghearrliosta do Dhuais Litríochta an Aontais Eorpaigh, Éirinn 2009, scríbhneoir Gaeilge ina measc, Pádraig Ó Gallachóir.
Is iad na húdair atá ainmnithe Karen Gillece, Alison Jameson, Nuala Ní Chonchúir, Philip Ó Ceallaigh, Pádraig Ó Gallachóir agus Stephen Price. Roghnaíodh Ó Gallachóir as dhá úrscéal dá chuid,
Na Déithe Bréige
agus Seachrán na
Mic Uí gCorra.
Roghnaigh an giúiré na húdair ó liosta de 32 scríbhneoir Éireannach, idir scríbhneoirí Gaeilge agus Béarla, a chomhlíon na critéir. Fógrófar an buaiteoir ag deireadh mhí na Bealtaine.
Dúirt duine de mholtóirí an chomórtais, Sorcha de Brún: “Is é seo an chéad uair don Aontas duais litríochta uile-Eoraip mar seo a reáchtáil mar aon le fostú Ambasadóir Litríochta na hEorpa.
“Is í an tábhacht is mó a bhaineann leis ná go bhfuil an tAontas ag tabhairt aitheantais don litríocht den chéad uair i saol, i stair agus i bhforbairt chultúrtha na hEorpa, agus go ndéanfar litríocht chomhaimseartha na hEorpa a chur chun cinn ag an am céanna.”
Beidh duais €5,000 ag dul don té a bhainfidh, spreagadh, a dúirt de Brún, “go háirithe má chuimhnítear gur féidir le gairm na scríbhneoireachta bheith ina gort uaigneach go minic”.