Shocraigh Foras na Gaeilge Dé Luain go leanfadh siad ar aghaidh le maoiniú an iris Idirlín, Beo.ie, agus an nuachtáin seachtainiúil, Foinse.
Ceadaíodh conradh nua bliana €61,800 do Beo.ie. Dúirt cathaoirleach an Fhorais, Maighréad Uí Mháirtín, i bpreasráiteas gur "seirbhís luachmhar atá i Beo.ie atá ag teacht go láidir le tosaíochtaí an Fhorais maidir le láithreacht na Gaeilge ar an ngréasán domhanda".
Moladh fosta, go mbronnfaí conradh, i bprionsabal, ar Mhóinéar Teo, foilsitheoirí Foinse.
Thug an Foras le fios go raibh rún acu dul "i mbun idirbheartaíochta le Móinéar Teo. maidir le téarmaí an chonartha sin agus an conradh críochnúil a chur faoi bhráid an chéad chruinniú Boird eile. San idirlinn tá síneadh dhá mhí curtha leis an gconradh reatha."
Is annamh a dhéanann an Foras dhá chinneadh fhiúntacha in aon lá amháin. Má leantar den mhodh oibre seo, beidh ar an cholún seo iad a mholadh níos minice.