An seomra uachtair

Scéal an linbh agus na daoine a lean é

Ag gluaiseacht go Betleham. grianghraf: jaimie trueblood

Ag gluaiseacht go Betleham. grianghraf: jaimie trueblood

Wed, Dec 18, 2013, 01:15

Sna laethanta sin chuaigh reacht amach ó Chaesar August go ndéanfaí áireamh ar an domhan go léir. Nuair a tugadh an bhean óg Muire i gcuing phósta do Sheosamh fuaradh go raibh gin ina broinn aici.

Agus ag machnamh dóibh ar an méid sin, nuair a tháinig a haimsir chun na clainne a bhreith, shocraigh siad ar ghluaiseacht go Betleham Iúda, toisc go mba de shliocht Dháibhí iad.

Agus ghluais siad leo gan righneas lena n-asal faoi dhéin an bhaile, agus níorbh fhada ar an tslí dhóibh gur casadh buachaill óg orthu a raibh na deora leis. “Fóir orm,” arsa an buachaill, “óir níl athair ná máthair agam, ná duine gaolta a thabharfaidh aire dhom, ach mé im chaonaí aonair ar bhóthar is ar chnoc.” Agus ghlac an bheirt trua dó, agus is ea adúirt Seosamh: “Ná bíodh aon eagla ort, mar is fairsing í muin an asail atá againn, agus tá fáilte romhat teacht inár bhfochair.”

Agus ghluais an triúr acu i dteannta an asail go dtí gur casadh cailín óg orthu a bhí ag gol go fuíoch.

“Fóir orm, a dhaoine córa,” arsa an cailín, “óir caitheadh amach as mo theaghlach mé toisc gur saolaíodh leanbh dom, agus níorbh eol dom a athair, agus dhiúltaigh mo mhuintir dom le teann náire, agus b’éigean dom é a thabhairt ar láimh, agus ní ghlacfaidh duine ar bith liom.”

Agus ghlac an bheirt trua di, agus is ea adúirt Seosamh: “Ná bíodh aon eagla ort, mar is fairsing í muin an asail atá againn, agus tá fáilte romhat teacht inár bhfochair.”

Agus ghluais an ceathrar acu i dteannta an asail go dtí gur casadh seanduine orthu. “Fóir orm,” ar seisean de ghlór lag, “óir bhí mé ag obair don rí is nuair a tháinig an aois orm fuair sé duine níos óige ná mé agus caitheadh ar thaobh an bhóthair mé, agus tá ocras orm, agus n’fheadar cad tá i ndán dom.”

Agus ghlac an bheirt trua dó, agus tháinig na labhartha go Seosamh: “Ná bíodh aon eagla ort, mar is fairsing í muin an asail againn, agus tá fáilte romhat teacht inár bhfochair.”

Agus ghluais an cúigear acu i dteannta an asail go dtí gur nocht an baile agus teach ósta os a gcomhair. Chnag Seosamh go béasach ar an doras mór agus ba ghairid gur fhreagair cailín aimsire é. “Cad tá uaibh?” ar sise go borb leis an scuain, mar bhreithnigh sí a gcuid giobal d’aon scuab súl amháin.

Mhínigh Seosamh an scéal go cruinn di, ach bhí a dualgas giolla le déanamh aici agus níor lean an bhailbhe í. Bhí siad ar tí imeachta go ceanntrom i dtreo an sciobóil nuair a tháinig fear sa doras.

“Th’anam an diucs!” arsa an fear, mar bainisteoir an ósta, is é a bhí ann, “an tú Seosamh?”

“Is mé,” arsa Seosamh.

“Is fada mé ag feitheamh libh,” arsa an fear, straois an gháire ar a aghaidh, “tagaigí isteach, mar tá seomra faoi leith in áirithe agam daoibh!”

Agus bhí iontas ar Sheosamh, agus léim an leanbh a bhí ina broinn ag Muire, mar ní raibh seo ag comhlíonadh ar tháinig ó bhéal an fháidh. “Ach fanadh an triúr eile seo lasmuigh go fóill, mar caithfear aire a thabhairt don asal,” arsa an fear, ag dúnadh an dorais de phlab.

Agus tugadh isteach i seomra mór iad, seomra ina raibh na fallaí déanta d’ór, agus an leaba d’airgead, agus síoda agus sróill ar sileadh i ngach ball. Agus tugadh ionad faoi leith do Mhuire, agus tháinig na lianna léannta isteach chun cabhraithe léi, agus leagadh bianna borba blasta os comhair Sheosaimh fad is a bhí sé ag feitheamh.

Agus bhí súil ag fear an tí go n-inseofaí na nithe seo uile ar fud sléibhte an domhain, agus go bhfógrófaí go bhfaighfí an leanbh fillte sna héadaí ab fhearr agus é ina luí i gcliabhán órfhite agus clúmh na lachan faoi.

Óir thuig sé go maith gurb é seo ba dhual don té a bheadh ina rí ar an domhan, agus na billiúin ag tabhairt dó ómóis.

Agus nuair a saolaíodh an leanbh, d’fhiafraigh Seosamh go caoin: “Cá bhfuil an buachaill, an cailín, agus an seanduine ionas go mblaisfidh siad den aoibhneas seo?”

“Amuigh sa scioból,” arsa fear an tí, “cén áit eile?”

Sign In

Forgot Password?

Sign Up

The name that will appear beside your comments.

Have an account? Sign In

Forgot Password?

Please enter your email address so we can send you a link to reset your password.

Sign In or Sign Up

Thank you

You should receive instructions for resetting your password. When you have reset your password, you can Sign In.

Hello, .

Please choose a screen name. This name will appear beside any comments you post. Your screen name should follow the standards set out in our community standards.

Thank you for registering. Please check your email to verify your account.

We reserve the right to remove any content at any time from this Community, including without limitation if it violates the Community Standards. We ask that you report content that you in good faith believe violates the above rules by clicking the Flag link next to the offending comment or by filling out this form. New comments are only accepted for 3 days from the date of publication.