Lánpháirtíocht an phobail Mhoslamaigh i saol na Fraince ina cnámh spairne

Wed, Dec 5, 2012, 00:00

TUARASCáIL:Mí Mheán Fómhair seo caite bhí círéibeanna i gceantair Mhoslamacha sa Fhrainc mar gheall ar an scannán ar an idirlíon L’Innocence des Musulmans agus cartúin díspeagúla faoi Mhahamad, fáidh, san iris aoire, Charlie Hebdo.

Ó shin i leith, tá ceist lánpháirtíochta na Moslamach i saol na Fraince, nó l’intégration mar a thugtar air go mór faoi chaibidil i meáin chumarsáide na tíre sin.

Meastar go bhfuil idir cúig agus deich milliún Moslamach ina gcónaí sa Fhrainc. Toisc nach gceadaítear ceisteanna faoi chine ná faoi chreideamh a chur ar fhoirmeacha daonáirimh, is deacair figiúr cruinn a thabhairt faoina líon ná faoin mhéid acu a chleachtaíonn a gcreideamh.

Níl amhras ar bith ann ná gurb é an tIoslamachas an dara reiligiún is mó sa tír. Feictear do lucht a chleachtaithe, áfach, go bhfuil na húdaráis stáit ag diúltú a aithint gur saoránaigh dhlisteanacha de chuid na Fraince iad.

Mar sin féin, de réir suirbhé a rinne an nuachtán Le Figaro measann 68 faoin gcéad den phobal gurbh iad na Moslamaigh féin a dhiúltaíonn a bheith lánpháirteach i saol na Fraince.

Ó thíortha thuaisceart na hAfraice, ón Ailgéir go háirithe, don chuid is mó de Mhoslamaigh na Fraince agus is ábhar imní don eite dheis é go leathnóidh an bunúsaíochas Ioslamach, atá ag fáil an lámh in uachtar sna tíortha sin, go dtí an Fhrainc.

Faoina thionchar, dar le cuid acu, a bhí an fear óg Mahomed Merah a rinne ionsaí ar Ghiúdaigh i Toulouse mí an Mhárta seo caite. Cur amú ama agus airgid, dar leo, na hiarrachtaí atá ar siúl chun Moslamaigh a spreagadh chun a bheith lánpháirteach i saol na tíre.

Tá go leor scríofa agus ráite le bliain anuas faoi na conspóidí a d’eascair as an chosc ar mhná an clóca fada a chlúdaíonn a n-aghaidh, an burqua, a chaitheamh in áiteanna poiblí. Ach is iomaí réimse eile den saol poiblí ina mbraitheann Moslamaigh a gcearta a bheith á séanadh orthu: i scoileanna, sna príosúin agus sna hospidéil.

Tá an cosc ar chailíní hijab a chaitheamh ina chnámh spairne go fóill i scoileanna áirithe agus ní mó ná sásta a bhíonn tuismitheoirí ceartchreidmheacha le cuid de na hábhair a mhúintear do na daltaí ar scoil – scríbhinní frith-Mhoslamacha Voltaire mar shampla. Is ábhar conspóide é ina lán scoileanna an bia a chuirtear ar fáil sna ceaintíní.

Tá cosc ar Mhoslamaigh muiceoil a ithe. Déantar iarracht freastal orthu trí ispíní déanta de shicín nó de thurcaí a sholáthar ach, i gceantair áirithe ina bhfuil pobal mór Moslamach, tá éileamh ann le haghaidh feoil halal, is é sin, feoil ó ainmhithe a maraíodh de réir dheasghnátha na Moslamach.

Ní lú na fadhbanna a bhíonn ag na hospidéil phoiblí agus othair ag diúltú bianna áirithe agus doicheall ar mhná torracha ligean do dhochtúirí fir iad a scrúdú. Chomh fada agus is féidir déanann na hospidéil a ndícheall freastal orthu ach níl go leor cnáimhseoirí mná ann.

Cuireann cuid de na hospidéil iachall ar lánúnacha páipéar a shíniú ag glacadh leis nach féidir a dhearbhú go mbeidh bandochtúir ar fáil sula nglactar le bean mar othar.

De réir dhlí na Fraince tá cosc ar fhostaithe stáit aon bhaint oifigiúil a bheith acu le cúrsaí creidimh.

Ach tuigeann ceannairí áirithe, nuair a bhíonn deasghnátha creidimh fite fuaite i saol laethúil an phobail, nach féidir neamhaird a dhéanamh dá gcreideamh má táthar ag iarraidh lánpháirtíocht a chur chun cinn.

Duine de na ceannairí sin is ea méara Lille a cheadaigh go mbeadh uaireanta ar leith do mhná Moslamacha sa linn snámha poiblí. Cuireadh ina leith go raibh an dlí á shárú aici ach sheas sí an fód ar mhaithe leis na mná, nach gceadófaí dóibh dul in aice leis an linn mura mbeadh na huaireanta sin ann.

I bPáirc an Fhionnuisce i mBaile Átha Cliath chonaic mé scata fear óg ag ullmhú beárbaiciú. Sular thosaigh siad ag ithe sheas siad i líne ag cantaireacht agus ansin síos ar a nglúine leo ar mhataí paidreoireachta ar an talamh. Rith sé liom gur radharc é sin a fheicfear níos minice sa tír seo mar is é an tIoslamachas an creideamh is tapúla fás. Nach bhfuil sé thar am ag na húdaráis, thuaidh agus theas, dul chun cainte le ceannairí na Moslamach agus pleanáil a dhéanamh i gcomhair leo agus, b’fhéidir, rud nó dhó a fhoghlaim ó thaithí mhuintir na Fraince?

Sign In

Forgot Password?

Sign Up

The name that will appear beside your comments.

Have an account? Sign In

Forgot Password?

Please enter your email address so we can send you a link to reset your password.

Sign In or Sign Up

Thank you

You should receive instructions for resetting your password. When you have reset your password, you can Sign In.

Hello, .

Please choose a screen name. This name will appear beside any comments you post. Your screen name should follow the standards set out in our community standards.

Thank you for registering. Please check your email to verify your account.

We reserve the right to remove any content at any time from this Community, including without limitation if it violates the Community Standards. We ask that you report content that you in good faith believe violates the above rules by clicking the Flag link next to the offending comment or by filling out this form. New comments are only accepted for 3 days from the date of publication.