Borradh buan

Wed, Sep 15, 2004, 01:00

Is é "Borradh Buan" teideal fhéile ghairmiúil drámaíochta trí mheán na Gaeilge a bheidh ar siúl in Ionad Ealaíon Axis, Baile Munna, le linn Fhéile Amharclainne Bhaile Átha Cliath i mí Dheireadh Fómhair. Is é an t-aisteoir Ray Yeates a d'eagraigh:

  • Geasa le Gearóid Mac Umfraidh, Aisteoirí Bulfin a chuirfidh ar stáitse. Scéal faoi shaighdiúirí Chonnacht le linn an Chogaidh Mhóir.

Agus iad ag fanacht le mórionsaí Gearmánach, ceistíonn na saighdiúirí a ndílseacht dá dtír, dá móid, dá muintir agus dóibh féin. Ray Yeates a léiríonn. Bhain an dráma seo duais Oireachtais. Dé hAoine 1ú agus Dé Sathairn, 2ú Deireadh Fómhair ag 8 p.m.

  • Cinnín Óir, athchóiriú ar shíscéal leis an aisteoir Máire Andrews agus í féin a bheidh ar stáitse. Dé Céadaoin, 6ú Deireadh Fómhair, 10 a.m agus 12 p.m.
  • Pádraic Ó Conaire le Diarmuid de Faoite. Seó aonair dátheangach ar shaol an scríbhneora. Déardaoin, 7ú Deireadh Fómhair ag 1 p.m.
  • Stair na hÉireann - cineál! leis an chompántas, Fibín. 11,000 bliain de stair na hÉireann i 45 nóiméad. Dé hAoine, 8ú Deireadh Fómhair ag 10 a.m. agus 12 p.m.
  • Anraith Neantóige le Celia de Fréine, Aisling Ghéar a léiríonn. Dráma polaitiúil é Anraith Neantóige a fhiafraíonn den phobal an bhfuil cumhacht dhaonlathach acu ar laethanta seo na gcomhlachtaí móra ilnáisiúnta. Dé hAoine, 8ú Deireadh Fómhair, ag 8 p.m.

Ach beidh an dráma céanna ar siúl roimhe sin i Theatre Space, Plás Anraí, seachtain ón oíche anocht go dtí an Satharn 25ú, Meán Fómhair, ag 8 p.m. Eolas: 01-8729977.

  • Lig Sinn i gCathú le Breandán Ó hEithir. Úrscéal cáiliúil Uí Eithir cóirithe don stáitse agus léirithe ag Darach Mac Con Iomaire, Taibhdhearc na Gaillimhe. Dé Sathairn 9ú agus Dé Domhnaigh 10ú Deireadh Fómhair ag 8 p.m.